Манчестер Сити, актуелниот шампион на Англија и вицешампион на Европа, и оваа сезона се чини е незапирлив.
Ливерпул бега девет бода на табелата (со меч повеќе), а во осминафиналето на Лигата на шампионите го совлада Спортинг, моментално можеби најдобриот португалски тим, со 5:0 на гостински терен.
Сепак, Пеп Гвардиола сè уште бара начини да ја усоврши својата „машина“, како со тактички решенија, така и со засилувања во преодниот рок. Најинтересно ќе биде да се следи Ерлинг Холанд. Летово се активира клаузулата според која секој клуб кој на Борусија Дортмунд ќе ѝ плати 75 милиони евра може да влезе во преговори со играчот.
Проблемот со Манчестер Сити е што Гвардиола е во многу лоши односи со неговиот менаџер Мино Рајола, поради што е ставено неформално вето на сите играчи од неговата агенција. Сепак, Гвардиола е подготвен да „си го погази зборот“, како што пишува шпански Esport.
Згора на тоа, англискиот шампион е свесен дека само со големи бонуси може да го добие норвешкиот напаѓач. Така, тие се подготвени, според истиот извор, на Рајола да му платат дури 50 милиони евра доколку Холанд потпише за нив. Оваа опција ја поддржува и таткото на Холанд, поранешен играч на „Граѓаните“.
Младиот Холанд оваа сезона има учинок од 23 гола на 20 натпревари.
