Меѓу жртвите во терористичкиот напад во центарот на Виена, што се случи во понеделникот вечерта, се и двајца странски државјани – Македонец и Германка, информира австриската полиција.
Според полицијата, жртвите на нападот се 39-годишен Австриец, 44-годишна Австријка, 21-годишен Македонец и 24-годишен Германец.
Македонецот бил случаен минувач, кој е убиен додека се движел по улиците на Бермудскиот Триаголник, дел од центарот на Виена познат по своите бројни кафулиња, пабови и барови.
Што се однесува до жртвите со австриско државјанство, 39-годишниот маж бил убиен пред ресторан за брза храна на Шведенплац, а 44-годишната жена во болница им подлегна на повредите здобиени при нападот.
Напаѓачот, идентификуван како Кујтим Фејзулаи, роден во Австрија, но по потекло од Северна Македонија, беше ликвидиран од полицијата, откако преходно на улиците во центарот на Виена уби четири лица и им нанесе повреди на уште 24 други, на возраст од 21 до 43 години. Од таа бројка, 13 се здобиле со повреди од куршуми, а остантите се повредени при бегството од напаѓачот.
Повеќето повредени се Австријци, но меѓу нив има и државјани на Германија, Словачка, Луксембург, Авганистан и Босна и Херцеговина.
Уапсени се двајца мажи од Виена, а полицијата се обидува да утврди дали напаѓачот бил дел од некоја поширока мрежа. Тие се уапсени откако полицијата изврши претрес во нивните станови, а станува збор за момчиња на возраст помеѓу 20 и 25 години кои во Виена живеат со нивните роднини. Еден од нив е со потекло од нашата држава, а другиот е од Чеченија. И двајцата биле во контакт со напаѓачот.
Читајте следно: Тројца од напаѓачите во Виена имаат и македонско државјанство
