Златан Ибрахимовиќ има последна шанса да игра на Мундијал, но само доколку Шведска го мине баражот. Тоа му е голема желба откако пропушти ЕУРО 2020.
На 3 октомври наполни 40 години, но нема намера да ги закачи копачките. Сепак, нетипичната возраст за еден фудбалер си го прави своето, а признава и самиот тој.
„Иднината малку ме загрижува. На 40-годишна возраст станав малку анксиозен“, признава Ибра говорејќи за Corriere della Sera.
Не знае што ќе биде откако ќе се пензионира, но едно знае, нема да се бави со тренерскиот занает.
„Не би знаел, тоа е многу стресна работа... Ќе работам нешто што ќе ми даде адреналин“.
Откако се врати во репрезентацијата на Шведска во март, следуваше повредата и големото разочарување дека го пропушта Европското првенство. Сега очите му се вперени кон Скудетото, за кое се бори со Милан, како и кон Мундијалот кој наредната доцна есен ќе се одржи во Катар. Златан тогаш ќе има 41 година.
„Сѐ додека се држам, ќе бидам напаѓач. Сакам да се борам за Скудетото до последниот ден. И да играм на Мундијалот во Катар“.
За да стигне во Катар Ибра ќе мора да се надева дека неговата Шведска ќе успеа да го мине тешкиот бараж. Швеѓаните во полуфиналето играат дома против Чешка, а доколку поминат потоа во финалето ќе гостуваат кај подобриот од лутото дерби меѓу Русија и Полска. Пех за Ибра е тоа што поради жолти картони нема да може да игра против Чешка, но УЕФА веќе испрати барање до ФИФА на сите играчи да им се поништат ваквите суспензии, односно да не се пренесуваат од квалификациите во баражот.
