Малдиве дел Саленто е името на познатата плажа лоцирана во Марина ди Песколузе во Италија, а благодарение на бистрата вода и белиот песок на плажата го добила името по островската земја во Индискиот Океан.
Малдиве дел Саленто се смета за „рајска дестинација“ и е еден од најубавите крајбрежни делови во покраината Апулија. Покрај златниот песок и кристалното сино море, ова место се карактеризира со пејзаж на диви кринови, папрати и црвена земја.
Оние што таму прв пат доаѓаат секогаш се враќаат фасцинирани од волшебните места, раскошот на боите и бројните можности за рекреација што ги нуди Марина ди Песколузе.
Плажата е полна со клубови и одморалишта што се домаќини на локалното население и туристите. Исто така, овој крајбрежен дел има плажи што го задржуваат својот природен, див изглед.
Препораките за туристите посочуваат дека не треба да се задржуваат само во областа за капење на Малдиве дел Саленто, туку дека можат да ги истражуваат и крајбрежните градови во близина, вклучувајќи ги Отранто и Санта Мариа ди Леука.
Оваа област е исто така ризница за љубителите на археологијата, меѓу најважните во Јужна Италија и ги опфаќа праисториските пештери, мегалитските споменици, некрополите и античките населби.
Плажата Европски Малдиви е сè уште она што најмногу привлекува внимание и доби илјадници прегледи на TripAdvisor. Додека многумина во коментарите тврдат дека местото не може да се спореди со вистинските Малдиви, истакнуваат дека оваа споредба всушност се врзува за бистрината на морската вода што потсетува на онаа што ја опкружува споменатата островска држава.
„Морето е толку чисто, сино, топло и многу плитко. Може да одите далеку и под нозете не чувствувате ништо друго освен мек песок. Феноменално“, вели еден во низата коментари.
Малдиве дел Саленто се наоѓа Јужно од Лече, речиси на најјужниот дел од „петата“ на италијанската чизма, и излегува на Јонското Море.
