Во Австралија е отворена истрага за да се открие кој става игли за шиење скриени во јагоди што се продаваат во маркетите и на пазарите ширум земјата. Инцидентите предизвикаа масовна паника во Австралија, а службите стравуваат дека можни се појави на имитатори на злоделото.
Досега се регистрирани инциденти во шест покраини и територии во Австралија. Еден маж е хоспитализиран откако изел јагода во која имало игла.
Неколку брендови ги повлекоа своите производи, а најголемите синџири за продажба на овошје и зеленчук престанаа да продаваат австралиски јагои како мерка на претпазливост.
Австралискиот министер за здравство Грег Хант ѝ нареди на Службата за безбедност на храна за Австралија и Нов Зеланд веднаш да отвори истрага.
„Ова е многу брутално злосторство и напад врз јавноста“, рече тој.
Локалните служби исто така отворија истраги, но уште нема осомничени.
Првите случаи на подметнати игли во овошјето беа пријавени во Квинсленд минатата недела, а потоа се проширија во Нов Јужен Велс, Викторија, Јужна Австралија и Тасманија.
Одгледувачите на јагоди и полицијата велат дека дел од случаите можеби се дело на имитатори.
Квинсленд понуди награда од 100.000 австралиски долари (72.000 американски долари) за каква било информација за инцидентите.
Одгледувачите на јагоди изразија дополнителна загриженост дека ова скапо ќе ја чини индустријата што вреди околу 130 милиони австралиски долари годишно.
