Безбедноста на претстојното Светско фудбалско првенство, на кое домаќинот Катар се очекува да прими два милиона посетители од странство, ќе биде многу строга, бидејќи сите навивачи ќе бидат собрани во еден град, најави претседателот на ФИФА, Џани Инфантино.
Првиот човек на светскиот фудбал ова го изјави за време на посетата на Костарика каде беше примен од шефот на државата Родриго Чавес, а присуствуваше и на финалето на Светското првенство за фудбалерки до 20 години во неделата во Сан Хосе во кое Шпанија ја совлада Јапонија со 3:1.
– Сите навивачи од целиот свет се добредојдени (во Катар) на прослава, забава и гледање натпревари, но доколку некој сака да дојде и прави неред или нешто слично, секако дека не е добредојден и сите ќе бидеме многу строги, бидејќи безбедноста е на прво место, изјави Инфантино.
Катар е држава со 2,6 милиони жители, а земјата за време на Мундијалот од 21 ноември до 18 декември се очекува да ја посетат два милиона навивачи од целиот свет.