Ова е најдоброто Светско првенство во историјата на фудбалот, оцени денеска претседателот на ФИФА, Џани Инфантино, на конференција за новинари во главниот прес-центар во Доха.
-Зад нас се 62 натпревара без инциденти, атмосферата беше одлична. Прв пат екипи од сите континенти се пласираа во осминафиналето, прв пат жена судеше натпревар на Мундијал. Се приближуваме и до границата од 5 милијарди телевизиски гледачи, рече Инфантино.
Тој во своето воведно излагање изнесе и неколку бројки. Досега натпреварите во Катар ги гледале 3,27 милиони навивачи, или во просек 52.000, а најголема посетеност донел натпреварот меѓу Аргентина и Мексико со 88.966 гледачи.
Следниот Мундијал ќе биде за четири години во Канада, САД и Мексико на кој ќе учествуваат 48 репрезентации.
Форматот на натпреварување треба да биде 16 групи со по три репрезентации, но Инфантино најави и можност за промена на системот во 12 групи со по четири репрезентации.