Легендарниот Андрес Иниеста денеска за конференцијата за медиуми соопшти дека одлучил да ја напушти Барселона на крајот од оваа сезона.
33-годишниот Иниеста одлучи да му каже збогум на саканиот клуб после 22 години, па не можеше да ги сокрие солзите за време на денешното емотивно обраќање кон јавноста.
„Ова е моја последна сезона во Барселона. Долго размислував за ова и ова е многу тежок ден во мојот живот. Барса ми е се во животот и тешко ми е да се разделам од неа. Им се заблагодарувам на сите навивачи кои беа со клубот и мене и во добрите и во лошите времиња“, изјави Иниеста, кој најверојатно кариерата ќе ја продолжи во Кина.
Но, на прашањето дали е тоа вистина, тој само кратко одговори дека „сигурно нема да игра во Европа“.
Иниеста никогаш не ја освои Златната топка, што многу љубители на фудбалот го сметаат за неправда.
Сепак, Иниеста вели дека тоа не му е важно.
„Воопшто не ми е важно што ја немам освоено Златната топка. Воопшто не жалам поради тоа. Задоволен сум од постигнатото во кариерата, а најважен момент ми беше дебито во првиот тим“, изјави Иниеста.
Иниеста во дресот на Барселона одигра 669 натпревари во сите натпреварувања, а досега освои 31 титула.
Многу е извесно дека ќе ја освои и 32, бидејќи Каталонците се главни фаворити за освојување на титулата шампион на Шпанија.
