Без претходно предупредување, Instagram денеска промовираше огромна новост во начинот на кој функционира социјалната мрежа. Наместо досегашната вертикална поставеност на новите објави, почетниот екран беше поставен хоризонтално како кај опцијата Instagram Story и објавите се скролаа од десно кон лево.
Само половина час и неколку стотици илјади критики подоцна, Instagram се врати на нормалниот почетен екрен.
За краток временски период корисниците на Instagram можеа да го видат и да го тестираат новиот апдејт. Со промената, новите објави на профилите беа прикажувани на истиот начин како кај опцијата Instagram Story, што значи дека за да се отиде на следната објава беше потребно да се допре екранот.
Социјалните мрежи се преполнија во критики и негативни мислења за новиот апдејт, опишувајќи го како „лош и непотребен“. Само половина час подоцна, Instagram се врати во нормалната форма и повторно почна да ги прикажува објавите вертикално.
Извршниот директор на Instagram, Адам Мосери, накратко по случувањата објави дека апдејтот бил пуштен „по грешка“ и дека компанијата имала намера да направи само мал тест, но случајно апдејтот бил пуштен насекаде низ светот.
Веројатно од Instagram имале намера да го промовираат овој апдејт некаде по почетокот на новата година, со оглед на тоа дека кај сите корисници се појави порака која ги предупредуваше дека се направени промени на оваа социјална мрежа.
