Шведската полиција му дозволи на 37-годишен бегалец од Ирак да организира палење на Куранот синоќа пред главната џамија во Стокхолм.
Според шведските медиуми, овој „настан“ го организирал Салуан Момика, човек кој пред неколку години побегнал од Ирак. Како што објасни, претходно побарал дозвола од полицијата да организира јавно палење на светата книга за да го каже своето мислење за Куранот.
„Ова е демократија. Во опасност е ако ни кажат дека не можеме“, рече Момика, обраќајќи се на арапски јазик.
Пред палењето на Куранот, Момика зборуваше со толпата пред џамијата, а потоа зеде парчиња сланина и ги стави во светата книга.
„Потоа запали неколку страници од Куранот и со нозете ја газеше книгата. Ја шутна како фудбалска топка, додека го вееше шведското знаме“, пишуваат локалните медиуми.
Бројни граѓани пристигнаа пред џамијата за да го осудат овој чин и истакнаа дека не е соодветно да се понижуваат другите луѓе, нивната религија и ставови.
Иако од шведската полиција беше побарано да го забрани настанот, властите рекоа дека безбедносните ризици поврзани со палењето на Куранот не се од таква природа што, според сегашните закони, би можеле да ја оправдаат одлуката за одбивање на барањето за одржување на собирот.
„Настанот се одвиваше мирно и помина без инциденти“, соопшти стокхолмската полиција.
