Официјални лица на т.н. Исламска Држава објавија соопштение во кое ги повикуваат членовите на организацијата да ги интензивираат нападите ширум светот, особено во Европа, каде во моментов фокусот на официјалните лица на земјите е на војната во Украина.
Во соопштението на портпаролот на организацијата, Абу Омар ал-Муџахир, се вели дека членовите на ИСИС подготвуваат одмазда по смртта на поранешниот нивен водач Абу Ибрахим ал-Курајши.
„Со верба во Бога, најавуваме благословена одмаздничка кампања“, изјави портпаролот на организацијата.
Исто така, се наведува дека одмаздата пред сѐ значи интензивирање на нападите што ќе ги извршуваат членовите на оваа организација.
„Поддржувачите на ИСИС треба да ја искористат можноста кога крстоносците се борат меѓусебно во Украина за да вршат напади во Европа“, рече Ал-Муџахир.
Портпаролот на ИСИС се осврна и на актуелната ситуација во Израел и конфликтите меѓу припадниците на израелската армија и полиција и Палестинците.
„Ерусалим може да се ослободи од Евреите само со враќање на калифатот, а не со палестинското востание или со помош на оние кои имаат вредности кои се менуваат во согласност со интересите на нивните западни господари“, рече претставникот на ИСИС.
На крајот од своето обраќање тој ги повика сите муслимани во арапскиот свет да се спротивстават на лидерите кои имаат добри односи со Израел или сакаат да се помират со нив.
„Современите муслимански политичари кои се обидуваат да го ослободат Ерусалим не се ништо друго туку марионети во рацете на Израел и Западот“, заклучи т.н. Исламска Држава во објавеното соопштение.