Научници од лондонскиот Империјал Колеџ утврдија дека количината на антитела на коронавирусот во човечкиот организам драстично се намалува по закрепнувањето од заразата, пренесе BBC.
Токму антителата се клучни за имунитет на кој било вирус, а истражувачите откриле дека бројот на оние кои имаат антитела се намалил за 26 проценти од јуни до септември годинава. Според тоа, заклучиле дека имунитетот слабее и постои можност со вирусот да се заразиме повеќе пати.
Во истражувањето биле опфатени повеќе од 350.000 луѓе во Англија. Во првиот циклус на истражување од крајот на јуни до почетокот на јули присуство на антитела е утврдено кај 60 проценти од 1.000 луѓе. Во последниот циклус на истражување, спроведено во септември, само 44 луѓе од 1.000 имале антитела. Бројот на оние кои имаат антитела од летото до есента е намален за повеќе од четвртина.
„Имунитетот прилично брзо опаѓа и трите месеци од првиот циклус на истражување идентификуваа дека бројот на оние со антитела е намален за 26 проценти“, вели Хелен Вард, која учествувала во истражувањето.
Најголем пад се случил кај луѓето постари од 65 години и оние кои имале изразени симптоми, што не било случај кај луѓето кои биле помлади и кои немале симптоми.
Присутноста на поголема количина антитела е забележана кај здравствените работници, а се претпоставува дека причина за тоа е дека се често изложени на вирусот.
Веќе е потврдено дека се има случено луѓе по двапати да се заразат од коронавирусот, но научниците се надеваат дека вториот пат заразениот ќе има поблаги симптоми бидејќи очекуваат организмот да ја активира имунолошката меморија во борба против вирусот.