Италијанската фудбалска федерација (ФИГЦ) и Лучано Спалети постигнаа договор тој да го наследи Роберто Манчини на местото селектор на „Аѕурите“, објавија во петокот италијанските медиуми.
Како што пишува La Gazzetta dello sport, Спалети, првиот избор на ФИГЦ, ќе потпише тригодишен договор, до септември 2026 година.
La Gazzetta dello sport додава дека Спалети по неколку телефонски разговори му дал согласност на претседателот на ФИГЦ, Габриеле Гравина, со кого денеска ќе се сретне за да го финализира договорот.
По назначувањето, кое би можело да биде официјализирано во сабота, Спалети треба да ја одржи првата прес-конференција како селектор во понеделник, пренесува спортскиот весник.
По освојувањето на титулата во италијанската лига со Наполи во мај, 64-годишниот Спалети го напушти клубот. Сега ја презема репрезентацијата која и покрај европската титула во 2021 година не успеа да се пласира на Светското првенство 2022 во Катар.
Тој ќе има само неколку дена да се подготви за два клучни натпревари за „Аѕурите“ доколку сакаат да се пласираат на ЕУРО 2024, прво во Македонија на 9 септември и против Украина во Милано три дена подоцна.
Преговорите со Спалети беа комплицирани поради постоењето на клаузула во неговиот договор која се уште го обврзува со Наполи, до јуни 2024 година, а според која клубот треба да наплати отштета од 3 милиони евра доколку тој ја прифати новата функција.
Претседателот и сопственик на Наполи, Аурелио Де Лаурентис, го предупреди ФИГЦ дека нема да се откаже од оваа такса, која се намалува за 250.000 евра секој месец.