Со реванш полуфиналниот дуел од италијаскиот куп помеѓу Јувентус и Милан официјално ќе биде означено продолжувањето на фудбалот на Чизмата.
Вечерва од 21:00 часот на „Алијанц“ стадионот во Торино екипата на Јувентус го пречекува Милан. Натпреварот ќе го означи долго очекуваното продолжување на фудбалската сезона во Италија после прекинот од почетокот на март поради пандемијата со коронавирусот.
Првиот натпревар во Милано заврши без победник, 1:1, па сега на Милан му треба гол на гости и барем да остане непоразен. Голем хендикеп за тимот на Стефано Пиоли ќе претставува отсуството на најдобриот поединец Златан Ибрахимовиќ. Швеѓанецот истегна мускул и дефинитивно не е во комбинација. Вон стројот е и дефанзивецот Матео Музакио. Додатен проблем за „Росонерите“ се и суспензиите на крилото Саму Кастиљехо и левиот бек Тео Ернандес. Кај „Старата Дама“ ќе недостасуваат единствено Гонсало Игуаин и Мерих Демирал.
„Имаме наша цел оваа сезона, а тоа е Милан да се врати во Европа. Постојат два начина: преку купот или преку лигата. Календарот ни вели дека првата шанса е Копа Италија. На играчите секогаш им велам дека не се важни имињата испишани на грбот од дресот, туку амблемот кој стои на градите. Со најголема страст и пасија се враќаме на терен и ќе дадеме сѐ од себе“, вели Пиоли.
„Сезонава Милан постојано ни создаваше проблеми, па така резултатот од првиот натпревар не ни гарантира ништо. Ќе биде отворен натпревар. Ние сме во игра во три натпреварувања, кои ќе бидат играни одделно, а тоа може да биде предност за подобра концентрација“, рече Маурицио Сари.