Португалецот Кристијано Роналдо не ни пристигна во Торино, а треската веќе започна. Неговиот нов дрес со број 7 се продава „како алва“ во продавниците на актуелниот италијански шампион Јувентус.
Довчерашната ѕвезда на Реал Мадрид го шокираше фудбалскиот свет и по 9 многу успешни години во Шпанија летово направи трансфер во Јувентус.
Во цела Италија владее фудбалска еуфорија откако Роналдо го официјализираше трансферот во Јувентус, па фановите на Јувентус почнаа да се редат пред продавниците за спортска опрема и да го купуваат дресот со број 7 кој ќе го носи Португалецот.
Првиот ден по трансферот продавниците продаваа по еден дрес на минута, а силното темпо продолжи и во наредните денови. Јувентус продаде повеќе од половина милион дресови досега и доколку се земе предвид дека цената на еден од нив е 104 евра, тоа значи дека клубот врати половина од платените пари за трансферот на Кристијано Роналдо.
Во меѓувреме, раководството на Јувентус најави дека официјалното претставување на Португалецот ќе биде во понеделник, еден ден по завршувањето на СП во Русија.
Роналдо во моментов е на заслужен одмор на грчкиот одмор Пелопонез, каде успеа и да оствари средба со претседателот на Јувентус, Андреа Ањели.