Фудбал викендов ќе се игра во некои земји, а од поинтересните првенства активни се Русија, Турција, Мексико, Австралија, Бразил и Украина.
Пандемијата со корона вирусот направи локдаун во поголемиот дел од фудбалските лиги ширум светот. Додека Примера, Премиер и Бундеслигата се прекинати, а Серија А освен што е во прекин туку и има заразени фудбалери, некои првенства ѝ пркосат на пандемијата.
Фудбал со публика се игра во Русија
Руската најдобра лига, како и тие под неа, викендов се активни. Денеска Спартак му гостува на Оренбург, шампионот Зенит го пречекува Урал, а најинтересно се очекува да биде на дуелот помеѓу Ростов и Локомотив кој се игра утре. Сите натпревари се играат со публика.
Истанбулското дерби пред празни трибини
Фудбалот не запира ни во Турција. Викондов ќе се тркала топката, но сите натпревари ќе се играат пред празни трибини. Во турската Супер Лиг најинтересно ќе биде в недела кога Галатасарај и Бешикташ ќе ги одмерат силите во дербито број 244 (во сите официјални натпреварувања).
Малку фудбал ширум Европа
Освен Русија и Турција, на европскиот континент фудбал ќе има само уште во Унгарија, Србија, Украина, Белорусија и Казахстан. Унгарците играат натпревари од националниот куп и тоа сите без присуство на публика. Во Србија се игра редовно лигашно коло, но истотака зад затворени врати. Затоа пак во Украина сезоната се одвива најнормално, со публика.
Ширум светот
Во останатиот дел од светот топката ќе се тркала претежно во Јужна Америка и Африка. Аргентина, Бразил, Боливија, Еквадор и Чиле ќе играат фудбал. Во Аргентина најдобрата лига веќе заврши, но останатите се уште во тек, а викендов почнува и Лига купот. Во Бразил се играат регионалните првенства.
Во Северна Америка активни се Мексиканците, а се игра и во некои карипски и средноамерикански земји.
Во африка поголемиот дел од активните лиги продолжувата со играње. Од поинтересните првенства тоа се Алжир, Ангола, Јужна Африка и Мароко.
Азија, континентот од каде се рашири корона вирусот, има неколку активни првенства. Фудбал се игра во Индија, Индонезија, ОАЕ, Виетнам, Узбекистан и она најквалитетното, во Австралија.
Нема прекин и во Океанија, поточно во најдобрата лига на Нов Зеланд.