ЦИА објави упатства на руски јазик со чија помош некој може тајно да се поврзе со разузнавачката агенција на САД со цел размена на информации, пишува Washington Post.
Како што соопштија неименувани извор за тој весник, ЦИА на социјалните мрежи објави детални упатства на руски јазик за тоа како некој информант може да обезбеди пренос на податоци, без да биде откриен.
Централната разузнавачка агенција советува да се користи интернет пребарувачот TOR кој овозможува анонимно сурфање на интернет, како и виртуелни приватни мрежи или VPN. ЦИА советува во тие цели да не се користи приватен компјутер или компјутер од работното место.
„Сакавме да осигураме безбеден начин за воспоставување комуникација“, изјави анонимен американски разузнувач кој тврди дека Русите се обидуваат да ја контактираат ЦИА, пренесе Wasington Post.
Според упатството, шпионите треба да го наведат нивното целосно име, земјата од која пишуваат, официјалната должност, како и да прецизираат „каков пристап имаат до информации од интерес“ за американската разузнавачка служба.
Според зборовите на поранешни разузнавачи, сите тие информации внимателно се анализираат и проверуваат.
Со ваквиот „нов пристап“, ЦИА се надева дека ќе добие поголем пристап до официјално доверливи информации за Русија, пишува весникот.
