Европската комисија (ЕК) предложи обврзувачко намалување на потрошувачката на електрична енергија во периодите на најголемо оптоварување, и пренасочување на дополнителните профити на енергетските компании кон најранливите граѓани и претприемачи поради огромниот пораст на цените на енергијата.
„Ќе предложиме обврзувачка цел за намалување на потрошувачката во време на најголемото оптоварување и тесно ќе соработуваме со земјите-членки за да го постигнеме тоа“, рече претседателката на ЕК Урсула фон дер Лајен, презентирајќи ги предлозите за мерки за запирање на вртоглавото поскапување на енергенсите.
Мерките имаат за цел да им помогнат на најзагрозените граѓани и бизниси. „Што и да правиме, ќе мора да заштедиме, но да заштедиме на паметен начин“, додаде таа. Електричната енергија потрошена во периодите на најголемо оптоварување е најскапа и затоа е потребна стратегија за изедначување на потрошувачката во текот на денот“, додаде Фон дер Лејен.
Друг предлог вклучува ограничување на приходите на компаниите кои произведуваат електрична енергија по ниски трошоци, како што се оние кои добиваат електрична енергија од обновливи извори, и пренасочување на дополнителниот профит кон ранливите групи граѓани и бизниси. Идејата е да се воведе ограничување на приходите за компаниите кои произведуваат електрична енергија од фосилни горива.
„Компаниите за нафта и гас исто така имаа огромни приходи, затоа предлагаме нивен заеднички придонес“, вели Фон дер Лејен.
Земјите-членки треба да ги инвестираат овие приходи во обновливи извори на енергија за да им помогнат на ранливите домаќинства.
Четвртата мерка предложена од ЕК е поддршка на енергетските компании за да можат да се справат со нестабилноста на пазарот.
Предложените мерки вклучуваат ограничување на цената на гасот што се увезува од Русија. „Целта е многу јасна, мораме да ги намалиме руските приходи што рускиот претседател Владимир Путин ги користи за финансирање на страшната војна против Украина“, рече Фон дер Лајен.
Европската Унија веќе драстично го намали увозот на руски гас. На почетокот на војната против Украина, ЕУ увезуваше 40 отсто гас од Русија, а денес е девет отсто. За предложените мерки ќе разговараат министрите на земјите-членки задолжени за енергетика, кои во петок ќе се соберат на вонреден состанок.
Да потсетиме дека рускиот претседател Владимир Путин вчера се закани дека ќе го запре снабдувањето со енергија доколку се воведат ценовни ограничувања на рускиот гас и нафта, предупредувајќи го Западот дека тој ќе остане „замрзнат како опашката на волкот во познатата руска бајка“.
Говорејќи на економски форум во источниот град Владивосток, Путин рече дека европските повици за ограничување на цените на рускиот гас се „глупави“ и ќе доведат до повисоки цени на енергијата ширум светот и економски проблеми во Европа.
„Русија ќе се повлече од договорот за снабдување доколку Западот спроведе план за ограничување на цените“, рече Путин. „Дали ќе има политички одлуки спротивни на договорите? Да, нема да ги исполниме. Нема да извезуваме ништо ако тоа е спротивно на нашите интереси“, најави тој.
„Нема да извезуваме гас, нафта, јаглен, мазут - нема да испратиме ништо“, предупреди Путин, а потоа додаде: „Ќе ни остане само едно: како во познатата руска бајка, да го оставиме волкот да му замрзне опашката“.