Претседателката на Европскиот парламент, Роберта Мецола, најави реформи во насока на борба против „корупцијата“ и „странското мешање“ во работата на тоа тело на Европската Унија, како и одлуката за одземање на имунитетот на двајца европратеници поради корупцискиот скандал со лобисти и лица поврзани со ЕП и Катар.
„Настаните во изминатиот месец ја покажаа потребата од обнова на врските на доверба со европските граѓани што ги претставуваме“, рече Мецола на отворањето на пленарната седница на Европскиот парламент во Стразбур. „Ќе преземеме чекори за зајакнување на борбата против корупцијата и средствата за борба против странското мешање“, додаде таа.
Минатиот месец Европскиот парламент го потресе истрагата на белгиското правосудство, во рамките на која беше приведена поранешната потпретседателка на тоа тело, грчката социјалистичка претставничка Ева Каили, под сомнение за корупција. Каили е во притвор по полициските рации минатиот месец, а на претходната пленарна седница на парламентот во декември беше сменета од функцијата потпретседател на ЕП.
Во Стразбур, Мецола ја објави првата серија антикорупциски мерки кои имаат за цел да ја зголемат транспарентноста и да го отежнат влијанието врз законодавците на ЕУ.
„Ќе започнеме со мерки кои можат брзо да се спроведат и во исто време да започнеме долгорочен процес (реформи) за зголемување на транспарентноста и контролата врз тоа кој има пристап до парламентот“, најави таа.
„Ќе обезбедиме повеќе и појасни информации до јавноста“ за тоа што прави Европскиот парламент, „ќе забраниме активности кои може да предизвикаат забуна за официјалните активности на парламентот, особено во однос на односите со трети земји“, вети меѓу другото шефицата на ЕП.
Заедно со грчката европратеничкаа, неколку лица се осомничени за перење пари, здружување во криминална организација и примање мито од Катар, а под истрага се и двајца европратеници од Социјалистичкиот клуб, Белгиецот Марко Тарабела и Италијанецот Андреа Коцолино.
Мецола најави дека белгиските власти побарале да им се укине имунитетот и оти очекуваат конечна одлука за ова барање на следната пленарна седница на 13 февруари.
Според деловникот, барањето за одземање имунитет претседателот треба прво да го изнесе на пленарна седница, по што ќе го преземе надлежната Комисија за правни прашања.
Осомничените во истрагата на белгиското обвинителство се обвинети дека во замена за пари и подароци влијаеле на одлуките во Европскиот парламент во корист на домаќинот на Светското првенство во фудбал, Катар. Во декември, како дел од истрагата, беше претресен и домот на Тарабела во Брисел, објавија претходно белгиските медиуми.
Во среда, европратениците избираат нов потпретседател на местото на разрешената Ева Каили, која се очекува да го поддржат кандидатот предложен од Клубот на социјалисти и демократи (С&Д), Марк Ангел од Луксембург.
