Сите некогаш сме држеле во рака рубикова коцка и сме се обидувале да ја наместиме. Но, како навистина фукционира оваа „магична“ коцка?
Рубиковата коцка е всушност 3D сложувалка. Измислена е во 1974 година од страна на еден унгарски вајар и професор по архитектура, по име Ерне Рубик. Тој првично ја нарекол магична коцна и како таква ја патентирал. Шест години подоцна иновацијата ѝ ја продал на американската компанија за играчки Ideal Toy кои веднаш одлучиле да ѝ го променат името во рубикова коцка.
Коцката на Рубик во стандардизираната и најчестата форма е 3×3×3 покриена со девет налепници во шест различни бои. Кога загатката е решена, лицето на секоја страна од коцката е во една боја.
До ден денес таа е најпродаваната играчка во светот, а постојат и различни варијанти со повеќе или помалку полиња.
Коцката фукционира со механизам кој вклучува 6 главни коцки на средината кои се фиксни, не ја менуваат положбата и на секоја од нив има само една налепница. Има 12 коцки кои имаат по две налепници, како и 8 со по три налепници - тоа се оние на ќошевите.
Загатката на рубиковата коцна човек може да ја реши, но постои и шема според која доколку ги следите чекорите може без голем напор и мислење да дојдете до конечното решение.
Се организираат дури и натпревари во брзина на решавање на рубикова коцка, а моментално светскиот рекорд го држи Кинезот Јушен Ду кому во 2018 му беа потребни само 3,47 секунди за да ја намести. Тој засега е единствен кој успеал да ја намести за помалку од 4 секунди.
