Францускиот фудбалер Карим Бензема поднесе тужба за клевета против францускиот министер за внатрешни работи кој го обвини за врски со Муслиманското братство.
Жералд Дарманин во октомври изјави дека Бензема „има врска“ со исламистичката група.
Адвокатот на Бензема тврди дека Дарманин со тој коментар ја „поткопал“ честа и угледот на фудбалерот. Муслиманското братство е забрането во неколку земји, вклучувајќи ги Египет, Русија и Саудиска Арабија. Коментарот на Дарманин дојде откако Бензема ја изрази својата поддршка за луѓето во Газа како „жртви на неправедно бомбардирање што не штеди ниту жени, ниту деца“.
Истакнувајќи дека не изразил слично сочувство за околу 1.300 израелски жртви убиени од Хамас на 7 октомври, Дарманин рече дека францускиот напаѓач е „добро познат по неговите врски со Муслиманското братство“, објави BBC.
„Ние се бориме против злото на Муслиманското братство, што создава атмосфера на џихадизам“, изјави политичарот за конзервативниот ТВ-канал CNews.
Бензема (36), кој игра во Саудиска Арабија и е муслиман, брзо ги негираше тврдењата на министерот и се закани со правна постапка.
Во својата жалба на 92 страници, за која вчера нашироко беше објавена во француските медиуми, Бензема вели дека „никогаш немал ни најмала врска со организацијата Муслиманско братство и, колку што знае, немал врска со некој што тврди дека е член од него“.
„Свесен сум до кој степен, поради мојата озлогласеност, ме искористуваат во политички игри, кои се уште поскандалозни со оглед на тоа што драматичните настани по 7 октомври заслужуваат нешто сосема поинакво од таквите изјави“, нагласи поранешната ѕвезда на Реал Мадрид.
Неговиот адвокат Хјуг Вижие изјави за француски RTL дека фудбалерот бил жртва на „политичка експлоатација“ и го обвини министерот за внатрешни работи дека „сее поделби во Франција“.
Дарманин сè уште не ја коментирал тужбата.
Министерот претходно го нападна Бензема поради други причини, вклучувајќи го и неговото одбивање да ја пее француската химна. Инаку, Муслиманското братство е основано пред приближно 80 години во Египет.
Тоа е првенствено идеолошко движење без формална структура и, иако е забрането во многу земји, не е ограничено во поголемиот дел од Европската унија.
Влијанието на групата во Европа главно се гледа преку параван организации кои водат кампања за исламски цели, како што е правото на жените да носат хиџаб.