Британски „Independent“ ја објави мапата Transforming World Atlas на која се прикажани регионите во Европа кои на некој начин се борат за независност. Речиси и нема земја во Европа што не е соочена со вакво прашање.
По референдумот за независност што се одржа во неделата во Каталонија, покрај противењето на власта во Мадрид и бруталното реагирање на полицијата на терен, прашањето за незавиност во Европа станува сѐ пожестока тема.
„Многу подрачја во Европа имаат силни движења за отцепување или политички партии што се залагаат за поголема автономија“, вели авторот на мапата.
Од регионот, територии што би можеле наскоро да направат потег сличен на оној во Каталонија, се Санџак и Војводина во Србија, а во Хрватска-Истра.
Во Италија и во Шпанија има најмногу движења за отцепување. Во Шпанија, освен Каталонија, независност сакаат и Андалузија, Кастилја, Леон и Арагон, а во Италија има вакви движења во Венеција, Падова, Ломбардија и други.
Во Франција има поделби во северниот дел, а во Велика Британија најизразени се Шкотска, Велс и Северна Ирска.
На мапата, со закосени букви се обележани регионите со движења што се залагаат за поголема автономија, но не и независност, а останатите обележани региони имаат движења за отцепување и независност, со различен интензитет.