Една од најпознатите катедрали во светот и една од најпосетуваните туристички локации во Париз е сериозно оштетена и потребна е итна реставрација за која француската влада бара донации за да обезбеди средства за обновување.
Парижани сметаат дека Виктор Иго, кој ја овековечи Нотр Дам во книгата „Ѕвонарот од Богородичната црква во Париз“, би бил фрапиран да види колку годините, загадувањето и временските услови ја оштетиле париската убавица што го краси главниот град.
Колосалното архитектонско достигнување што се градело еден век се наоѓа на листата светско наследство на УНЕСКО и годишно привлекува 12 до 14 милиони посетители.
Француската влада вложува околу 2 милиони евра годишно за одржување на катедралата, но списокот на работи што треба да се реставрираат, особено на надворешната страна, постојано расте.
„Државните фондови не се доволни, а состојбата во која се наоѓа катедралата е загрижувачка, итно се потребни големи зафати“, рече Андре Фино, портпарол на катедралата.