Турските демонстранти се судрија со полицијата во текот на ноќта кога се обидоа да влезат во израелскиот конзулат во Истанбул, јавува Reuters.
Палестинските власти објавија дека вчерашната експлозија била предизвикана од израелски воздушен напад, а Израел ги обвини за експлозијата во болницата „Ал Ахли“ додека тие ја отфрлаат поврзаноста.
Претседателот Реџеп Тајип Ердоган го нарече овој инцидент „последниот пример на израелски напади, кои се лишени од најосновните човечки вредности“, а неговата канцеларија за медиуми ги означи израелските тврдења како „дезинформации“.
Во текот на ноќта беа организирани протести во најмалку десетина турски градови, како и пред израелската амбасада во главниот град Анкара, каде што учесниците со палестински знамиња извикуваа слогани за осуда на Израел.
Полицијата употреби солзавец и водни топови за да ги растера илјадниците демонстранти, кои се обидоа да влезат во израелскиот конзулат во Истанбул, најголемиот град во Турција.
Пет лица се приведени, соопшти кабинетот на гувернерот на Истанбул.
Денеска, забележливо е зголемено обезбедувањето околу конзулатот, со стотина полицајци и 10-ина возила со водни топови, распоредени зад низа метални бариери, а се проверува идентитетот на оние што сакаат да поминат, пренесува британската агенција.
Израел ги повика своите граѓани веднаш да ја напуштат Турција
Израел ги повика своите граѓани да ја напуштат Турција што е можно поскоро заради нивна лична безбедност, изјавија за AFP од конзулатот на Израел во Истанбул, наведувајќи ги засилените „терористички закани“ за своите граѓани во странство.
Според тој извор, безбедносната тревога за израелските патници во Турција „е подигната на ниво 4, највисоко“.
„Со оглед на постојаното зголемување на терористичките закани против Израел во странство, сите Израелци кои живеат во Турција мора да заминат што е можно поскоро“, предупреди израелскиот Совет за национална безбедност во официјалното соопштение.
Во вторникот вечерта беа организирани протести пред израелскиот конзулат во Истанбул и пред амбасадата во Анкара, откако беше истрелана ракета врз болница во Појасот Газа, при што загинаа стотици цивили, пациенти и палестински раселени лица.
Израел и Палестинците меѓусебно се обвинуваат за ракетниот истрел, кој турскиот претседател Реџеп Тајип Ердоган ѝ го припиша на еврејската држава, осудувајќи го „последниот пример на израелски напади лишени од целото човештво“. Американскиот претседател Џо Бајден, кој го посети Израел, ја поддржа верзијата на израелските власти за настаните, обвинувајќи ги палестинските борци за ракетниот напад.