Хонгконг, 9 јули 2020 (МИА) – Властите во Хонгконг, кои успешно се бореа против пандемијата на коронарвирусот, сега предупредуваат за можен „експоненцијален раст“ на нови случаи, како резултат на зголемувањето на локалниото пренесување.
Од неделата, COVID-19 е дијагностициран кај 65 лица, вклучувајќи 31 локално пренесен случај што се нарекува „трет бран“ на пандемијата во Хонгконг.
Инфицирани се таксисти, работници во ресторани, медицински лица и лица во домови за нега на стари лица, пренесе CNN.
– Можно е да се работи за голема епидемија. Можно е ненадејно експоненцијално зголемување на бројот на заболени, изјави д-р Чуанг Шук-кван од Центарот за здравствена заштита.
Во Хонгконг регистрирани се 1.324 случаи на заболени од почетокот на епидемијата, а само седум лица починаа.
Причината за таквиот успех на градот во сузбивањето на COVID-19 е воведување на карантин за луѓе кои доаѓаа од странство, ефикасно следење на контакти, подготвеност на граѓаните да носат заштитни маски, да ги почитуваат мерките за хигиена и социјалната дистанца.