Македонскиот капитен Стефан Ристовски предизвика бура реакции во земјата каде настапува на клупски план, но и во соседна Србија, со изјава дека на Мундијалот во Катар ќе навива за репрезентацијата од која синоќа загуби.
Капитенот на македонската фудбалска репрезентација со грешно додавање им поклони контра на Португалците по која во 32. минута поведоа со 1:0. На крајот Португалија славеше со 2:0 во финалниот бараж и отпатува на Мундијалот.
По натпреварот Ристовски пред португалската јавност изјави дека на Светското првенство ќе навива токму за нив.
„Се разбира дека на Светското првенство ќе навивам за Португалија. Па јас по малку и се чувствувам Португалец. Мојот син е тука роден, имам португалски пасош и би сакал да видам како Португалија го крева мундијалскиот пехар“, кажа Ристовски.
Таквата изјави, која всушност е сосема нормална бидејќи Ристовски настапуваше во Спортинг од Лисабон од август 2017 до јануари 2021 (всушност последните месеци беше во конфликт со клубот и не играше), предизвика лавина реакции кај хрватските навивачи, особено оние на загрепски Динамо чии бои Стефан ги брани по заминувањето од Португалија. Ним им се придружија и српски навивачи кои очекуваат поддршка од Македонија на Мундијалот откако тие навиваа за Македонија и против Италија и Португалија.
Некои од коментарите по социјалните мрежи се:
„Синоќа играше за Португалија, не е проблем утре за нив да навиваш“.
„Човекот со прекрасна асистенција ги прати Португалците на Светско за да има за кој да навива, браво кралу“.
„А некој велеше дека сме браќа“.
„И тие за тебе. Можеби и ќе те викнат да им додаваш топки од страна за да вежбаат“.
„Па Ристовски асистираше за првиот гол на Португалија, нормално дека ќе навива за нив“.
„Онаков пас не му имаше дадено на Бруну додека играа заедно во Спортинг“.
„Ќе навива за тимот што го исфрли. Зошто? За ако Португалците освојат да има алиби, ете испаднавме од светските шампиони, не можевме повеќе од тоа“.
„Како одигра за Португалците, па може и да навива за Португалија. Уште и капитен“.
