Вечерва Борусија гостува кај Лацио во Рим, а еден домашен фудбалер влева страв и трепет кај гостинските дефанзивци.
Матс Хумелс една полусезона му беше соиграч на Чиро Имобиле, кога Италијанецот имаше неславна авантура во Бундеслигата. Во сезоната 2014/15 дојде како големо засилување во Дортмунд откако жареше и палеше во дресот на Торино, но не се вклопи во германскиот стил и по само една полусезона си замина. Иако на натпреварите не му одеше, Хумелс и соиграчите сепак добро го запознаа на тренинзите.
„Свесни сме со каков квалитет располага кога е во шестнаесетникот. Не смееме да му дозволиме често да влегува во шанса бидејќи тој е безмилосен пред голот“, вели Хумелс.
После лошата авантура во Дортмунд, Имобиле изгуби уште една сезона пробувајќи да си ја поврати формата во Севиља, каде не успеа. Но, откако се врати во Калчото повторо стана оној истиот, ако не и подобар.
„На крајот сѐ се сведува на тоа да направиме во колку што е можно помалку шанси да влезе. Тој е вистински егзекутор“.
Откако дојде во Лацио летото 2016, Имобиле постигна 126 голови на 181 натпревар во сите натпреварувања, а две сезони беше и најдобар стрелец во Серија А од кои минатата со дури 36 голови.