Свет

Кина го одложи почетокот на второто полугодие во училиштата и факултетите

28. јануари 2020 - 8:16 | МИА

Кина, поради епидемијата на коронавирусот, го одложи почетокот на второто полугодие во училиштата и факултетите до неопределено, соопшти кинеското Министерство за образование.

Пекинг вчера соопшти дека распустот за Кинеската Нова година ќе го продолжи до 2 февруари, меѓутоа денеска почетокот на наставата е одложен до натамошно известување.

„Универзитетите и високошколските установи под покровителство на Министерството треба на соодветен начин да го одложат почетокот на пролетниот семестар“, се вели во соопштението.

Според последниот биланс, Во Кина починаа 106 лица од коронавирусот, додека потврдени се 1.300 нови заразени случаи.

Градот Вухан, со 11 милиони жители, каде што е регистриран првиот случај на заболен од овој вирус, пред пет дена е ставен во карантин.

Јапонија денеска ќе испрати чартер лет кон овој град за да врати околу 200 граѓани, соопшти Владата во Токио.

Владата, исто така, ќе испрати доктори, медицински сестри и службеници за карантини со цел јапонските државјани да бидат прегледани во авион, соопшти Министерството за здравство.

Предвидено е авионот да се врати во Јапонија во среда, изјави министерот за надворешни работи Тошимицу Мотеги.

Со оглед на тоа што вкупно 650 Јапонци од Вухан сакаат да се вратат во својата земја, јапонската Влада ќе испрати повеќе летови за да ги однесе дома, информира Мотеги.

Коментирај