Актерката Кира Најтли жестоко ја прозиваше војвотката од Кембриџ Кејт Мидлтон во нејзиниот есеј „Послабиот пол“ објавен во книгата „Феминистките не носат розово“.
Во есејот, Најтли зборува за породувањето и за лажната слика што ја прикажуваат славните личности. Нејзината ќерка Еди е родена само еден ден пред принцезата Шарлот , а Најтли се потсетува што помислила кога ја видела Кејт како излегува од болницата совршено средена само неколку часа по породувањето.
„Ја гледав на телевизија. Излезе од болница седум часа по породувањето со шминка на лицето и во високи попетици. Се покажа онаква каква што луѓето сакаат да ја видат“, пишува актерката.
Истакнувајќи дека таквото однесување дава нереална слика за жените кои само што се породиле, Најтли директно ја напаѓа Кејт.
„Криј. Ти само продолжи да ја криеш нашата болка, нашите распарчени тела, градите од кои тече млеко, подивените хормони. Изгледај прекрасно, биди дотерана, не ги покажувај своите битки, Кејт. Седум часа откако се бореше меѓу живот и смрт, седум часа откако телото ти се преполови и нов живот излезе од тебе облеан во крв и со врескање. Не покажувај. Не зборувај. Стои таму со ќерката в раце и дозволувај да те снима толпа машки фотографи“, ѝ порачува Најтли во текстот.
Актерката исто така го споделува и своето искуство од породувањето, на крај обракајќи ѝ се на својата ќерка со зборовите: „Дали сум јас послабиот пол? Дали си ти?“
