Дојде крајот на уште една фудбалска икона, барем на репрезентативен план. Дефанзивецот Џорџо Кјелини објави дека ќе се збогува од аѕурниот дрес, а го објави и начинот на кој тоа ќе го направи.
На 1 јуни Италија како европски шампион ќе се пресмета со актуелниот шампион на Јужна Америка, репрезентацијата на Аргентина, во натпревар организиран од УЕФА и КОНМЕБОЛ, а со амин од ФИФА, и наречен Финалисима. Овој дуел е едноставно замена за укинатиот Куп на Конфедерации каде учествуваа сите актуелни континентални шампиони. Ќе се игра на стадионот „Вембли“ во Лондон.
Кјелини, кој во август ќе наполни 38 години, откри дека репрезентативните копачки ќе ги закачи токму заклучно со оваа голема пресметка. Ќе го одигра 117-тиот натпревар во аѕурниот дрес и ќе каже збогум. Неговиот план беше тоа да се случи по Мундијалот во Катар, но Македонија го натера да го промени планот и порано да каже ариведерчи.
„Нормално е на 38 години да се прекине и да се сфати како стојат работите. Доколку сум здрав ќе играм и ќе се поздравиме со репрезентацијата на 'Вембли', каде го достигнав врвот на мојата кариера. Ќе биде најдобро нешто да се збогувам од репрезентацијата со еден празничен натпревар како тој со Аргентина: во репрезентацијата дефинитивно ќе ми биде последен. Треба да им се остави простор на помладите кои се одлични“, рече тој говорејќи за Dazn.
Џорџо го носи синиот дрес уште од 2000 година кога почна од У15 репрезентацијата, а потоа ги мина сите возрасни категории пред да се зацементира како незаменлив бедем пред голот на Џиџи Буфон, со кого соработуваше со години.
Со Италија освои една титула и тоа летоска кога го освои ЕУРО 2020, токму на „Вембли“. Има и второ место од ЕУРО 2012, како и трето на Купот на конфедерации во 2013 и Лигата на нации 2020/21.
На клупски план најави дека ќе размисли што ќе прави откако ќе заврши сезоната, но најверојатно ќе го напушти Јувентус и ќе замине во САД да одогра уште малку.
