Италијанскиот дефанзивец Џорџо Кјелини, актуелниот првотимец на Лос Анџелес, одлучил да стави крај на професионалната кариера, пренесуваат бројни светски медиуми.
Според овие информации, 39-годишниот поранешен италијански репрезентативец оваа одлука ќе ѝ ја соопшти на јавноста во текот на денот, но неговата цел е да остане во фудбалот и по повлекувањето од играњето.
Како што изјавуваше во неколку наврати досега, целта му е целосно да се посвети на работата во Јувентус, без разлика дали како тренер или како функционер, тоа воопшто не е важно, а некои медиуми во Италија пишуваат дека оваа желба може да се оствари многу брзо.
Кјелини одигра повеќе од 500 официјални натпревари за клубот од Торино и освои 20 трофеи со „Бјанконерите“, а од италијанската репрезентација се прости со титулата европски првак на ЕУРО 2020 во 2021 година, кога Англија беше поразена во финалето на „Вембли“ по изведување на пенали.
Италијанецот родум од Ливорно минатиот викенд го одигра последниот официјален натпревар кога во МЛС финалето во Лос Анџелес загуби од Колумбус Кру со 1:2 и на тој начин ја пропушти можноста во својата колекција трофеи да го додаде и оној наменет за најдобриот тим во МЛС.
