Книжарница во Унгарија е казнета со околу 700 евра, бидејќи книга за деца во која се зборува за хомосексуално семејство не била соодветно обележана како „книга што не го претставува нормалното семејство“.
Книгата на Лоренс Шимел и Елина Браслин требало да има посебна ознака дека „не го претставува нормалното семејство“, изјави началникот на владината канцеларија на округот Пест, Рихард Тарнаи, за провладиниот телевизиски канал Hir.
Во книгата „Early One Morning“ се зборува за ЛГБТК семејството и е објавена од невладината организација Фондација за семејства на виножитото.
Унгарскиот државен службеник објасни дека книжарницата го прекршила Законот за забрана за нефер трговски практики и продажното место ќе биде казнето со 250.000 форинти (околу 700 евра).
„Таа книга ја ставиле меѓу книгите со бајки и со тоа го прекршија законот“, вели Тарнаи.
„Презентацијата на книгата не укажува дека приказната содржи обрасци на однесување кои се разликуваат од традиционалните родови улоги“, додаде тој.
Издавачот на книгата вчера изјави дека „секое семејство заслужува да има бајка што се однесува на него“.
„Семејствата на виножитото се сосема нормални. Сексуалноста на родителите не е тема на книгата“, додаде истиот извор.
Законот, кој беше критикуван и дома и во странство, треба да стапи на сила во Унгарија денеска и се смета за дискриминаторски за ЛГБТК луѓето.
Претседателот на Европската комисија, Урсула фон дер Лајен, вчера ја предупреди Унгарија дека мора да го укине законот со кој им се забранува на училиштата да користат материјали што се сметаат за промовирање на хомосексуалноста или да се соочат со законите на ЕУ.
Законот, воведен од унгарскиот премиер Виктор Орбан, беше остро критикуван од лидерите на Европската Унија на самитот минатиот месец, а холандскиот премиер Марк Руте ѝ рече на Будимпешта да ги почитува европските вредности или да ја напушти Унијата.
Орбан, кој е премиер на Унгарија од 2010 година и ги чека изборите следната година, стана уште поконзервативен и поборбен во промовирањето на, како што рече, „традиционалните католички вредности под притисок на либералниот Запад“.
