Кафето ни помага да се разбудиме наутро, и покрај тоа, овој пијалак има бројни здравствени придобивки.
Но, без разлика што ви се чини дека е најдобро да се напиете кафе веднаш штом се разбудите, сепак има подобро време за првата шолја кафе, за да можете целосно да ги искористите сите придобивки што ви ги нуди кафето.
Имено, не треба да пиете кафе штом станете од кревет, туку еден час откако ќе се разбудите. Во тој момент, производството на кортизол во телото е на еден од трите пикови во текот на денот, покажаа резултатите од една клиничка студија.
Кортизолот генерално се смета за „хормон на стресот“ затоа што се лачи во поголеми количини кога чувствуваме стрес или напнатост во околности за кои сметаме дека се напорни. Но, кортизолот, исто така, може да се смета за „хормон на будност“, бидејќи причината зошто телото произведува повеќе кортизол кога сме под стрес е да нѐ разбуди и да бидеме „на штрек“.
Внесувањето кофеин додека телото е во пикот на производството на кортизол го учи телото да произведува помалку кортизол, велат хронофармаколозите кои го проучуваат начинот на кој супстанциите, како кофеинот, влијаат на природните биолошки ритми на нашето тело.
Ова не само што го поткопува ефектот на кофеинот, туку и ја намалува способноста за разбудување што ја има кортизолот. Покрај тоа, може да придонесе за развој на толеранција на кафе што значи дека ни треба се повеќе и повеќе кафе за да ги постигнеме истите ефекти.
Значи, за целосно искористување на ефектите што ги нуди кафето, испијте ја првата шолја еден час откако ќе се разбудите, советува The Healthy. Вториот пик на производство на кортизол е околу 13 часот, а потоа околу 17 часот, па во некои од тие моменти можете да ја испиете следната шолја кафе.