Кралицата Елизабета Втора најави дека сака Камила, војвотката од Корнвол, да биде кралица кога принцот Чарлс ќе стане крал.
Во порака по повод 70-годишнината од нејзиното владеење, кралицата соопшти дека нејзина „искрена желба“ е Камила да ја добие таа титула, пренесе BBC.
Претходно се нагаѓаше дека сопругата на Чарлс би била „принцеза сопруга“ кога тој ќе стапи на престолот. Но, во пораката на кралицата стои „кога ќе дојде време за тоа“, Камила би требало да стане „кралица сопруга“.
Портпаролот Кларенс Хаус изјави дека принцот од Велс и војвотката од Корнвол се „трогнати и почестени“ од зборовите на кралицата.
Пораката на Елизабета, со која го обележува нејзиното стапување на престолот во 1952 година, директно се занимава со идната титула на војвотката од Корнвол.
„Моја искрена желба е, кога ќе дојде време, Камила да биде позната како кралица сопруга“, напиша кралицата.
„Кралица сопруга“ се однесува на сопружничката на кралот кој владее и би значело дека кралица Камила е нејзината идна титула. Вообичаен преседан би било таа автоматски да стане кралица кога Чарлс ќе биде крал, но поради несигурноста на јавното мислење се сугерираше дека Камила би можела да биде позната како „принцеза кралица“.
Тоа беше официјалниот став кога принцот Чарлс се ожени со Камила во 2005 година.