Легендарната пејачка Тина Тарнер доби своја верзија на барбика.
Куклата ја има нејзината препознатлива фризура, а облечена е како Тина од спотот за популарната песна „What's Love Got To Do With It“, објавена пред 40 години.
„Спотот го прегледавме безброј пати за да успееме во целост да ја ископираме нејзината фризура. Ни беше потребно многу лак за косата“, се пошегува креаторот на куклата Бил Грининг.
„Горди сме што ѝ одадовме почит на рокенрол кралицата Тина Тарнер, веруваме дека ги израдувавме колекционерите и љубителите на нејзината музика“, порачаа од компанијата Mattel.
Тина почна да настапува со Ајк Тарнер во 50-тите години на минатиот век. Подоцна се омажи за него и во брак беа до 1978 година.
Кон средината на 80-тите години го доживеа врвот на кариерата. Почна да оди на турнеи, а хитовите се нижеа еден по друг. Позната е како најдобрата рокенрол изведувачка на сите времиња.
