За време на денешниот брифинг со новинарите, од Кремљ велат дека секојдневните забелешки на американскиот претседател Џо Бајден за Владимир Путин се лични навреди - додавајќи дека изјавите на Бајден биле поттикнати од „раздразливост, замор и заборавеност“.
Бајден го нарече Путин „воен злосторник“.
Кремљ исто така ја нарече „луда“ одлуката на Велика Британија да ја одземе лиценцата на Russia Today во земјата.
Претходно денеска беше соопштено дека руската државна телевизија Russia Today нема повеќе да може да емитува програма во Велика Британија откако регулаторното тело Офком по итна постапка и ја одзеде лиценцата.
Во објаснувањето од регулаторното тело се наведува дека руската телевизиска станица не е „погодна и соодветна“ да емитува програма во Обединетото Кралство, после спроведената истрага што покажала пристрасност на медиумот во покривањето вести од Украина.
Истовремено забележува дека новововедените закони во Русија ефикасно ги криминализираат сите медиуми што излегуваат од држвниот наратив, пишувајќи за руската агресија врз Украина како за „специјална воена операција“.
Руската телевизија одлуката ја окарактеризира како „лоша проценка“ на регулаторното тело за кое рече дека е само алатка во раце на властите во Лондон.
Инаку, Велика Британија само неколку дена после почетокот на воените дејствија во Украина забрани емитување на програмата на руската национална телевизија, така што денешната одлука на регулаторот Офком е само симболична.
