Скопје, 30 јули 2019 (МИА) – Шеесет и седумгодишен скопјанец заработи кривична пријава поради објавен коментар на Facebook со заканувачка содржина кон премиерот Зоран Заев.
– Секторот за компјутерски криминал и дигитална форензика поднесе кривична пријава против В.З. (67) од Скопје, за сторено кривично дело „загрозување на сигурноста“ по пат на информатички систем. На 25.07.2019 година, на социјалната мрежа Facebook пријавениот, преку своето корисничко име, објавил коментар со заканувачка содржина кон премиерот на Република Северна Македонија, соопшти МВР.
Премиерот Зоран Заев на 25 јули од собраниската говорница информира дека ја пријавил во МВР заканата, која во порака на социјалните мрежи била напишана во коментар по прес-конференцијата со еврокомесарот за проширување Јоханес Хан.
- „Само куршум за тебе копиле, кој со мерак ќе ти го свирнам без око да ми трепне", гласела пораката која Заев ја прочита од својот мобилен телефон пред пратениците во Собранието.
Заев кажа дека се знае идентитетот на човекот кој ја напишал пораката и оти случајот е пријавен во МВР.
