Мнозинскиот сопственик на акциите во лондонскиот клуб Арсенал денеска даде понуда од 600 милиони до останатите акционери со која сака да ги откупи сите акции во клубот и да стане апсолутен сопственик на 13-кратниот англиски шампион.
Американецот Стен Кронке е сопственик на 67% од акциите во клубот, но сака да стане сопственик на сите акции во клубот поради неговата амбиција да го одведе Арсенал кон врвот на европскиот фудбал.
Мнозинскиот сопственик на остатокот од акциите е рускиот милијардер Алишер Усманов, чија компанија Red and White Securities поседува 30% од Арсенал. Понудата на Кронке од 600 милиони е веќе прифатена од страна на Усманов и се очекува во следните неколку дена транзицијата на сопствеништвото да биде комплетирана и Арсенал да има еден врховен сопственик, како голем дел од клубовите во Премиер лигата.
Арсенал во последните неколку години имаше разочарувачки настапи во Премиер лигата и во европските натпреварувања, но новата насока во која се движи клубот по заминувањето на Арсен Венгер ветува многу за навивачите.
Амбициите на Кронке изгледаат реални и изводливи, но тој сака да има целосна контрола над случувањата во клубот и затоа преферира да одлучува сам, без консултација на други акционери.
Но, работите не изгледаат така сјајно во очите на останатите директори во клубот, кои сметаат дека Кронке сака да го преземе целосното сопствеништво над Арсенал за да го стави клубот во долгови за да ги финансира неговите останати бизниси.
