Куп жрепка: Четвртфинална класика Пелистер - Вардар

Четвртфиналната жрепка за фудбалскиот Куп на Македонија одлучи еден против друг да играат најголемите ривали Вардар и Пелистер, иако и двата се далеку од фаворити за овогодинешниот пехар.

Во просториите на ФФМ денеска се изврши жрепката за четвртфиналето од јубилејната 30-та сезона во најмасовсното клупско домашно натпреварување. Бранителот Силекс походот кон одбрана на титулата ќе го продолжи против штипска Брегалница, клуб кој има за цел прв пат во својата историја да дојде до финалето до кое изминативе неколку сезони стигнува блиску, но никако да го направи последниот чекор.

Главни фаворите годинава дефинитивно се Шкендија и Шкупи, особено чаискиот клуб кој гази во лигата. Шкендија ќе ја пречека Струга, додека „Гулабите“ ќе патуваат кај локалниот ривал Македонија Ѓорче Петров.

Извлечени беа како прва двојка, но како најголемо дерби во оваа фаза ги оставаме за крај. Фортуната посака во Битола да ги одмерат силите Пелистер и Вардар, најголемите ривали во историјата на македонскиот фудбал. Иако и двата се мачат сезонава бидејќи битолчани се на дното од првата лига, а скопјани ги живеат најтешките денови и за прв пат играат во втората лига, сепак нивните имиња си го прават своето, без разлика на резултатите да овој натпревар е дербито на четвртфиналето.

Ова дерби ќе ги разбуди спомените на првото историско финале, одиграно во мај 1993 година кога токму овие два великана испишаа историја во независна Македонија, а „Црвено-црните“ го зграпчија пехарот победувајќи со 1:0. Сега, составите се далеку од тие времиња кога плејада познати фудбалски мајстори ги носеа двата дреса, но нивните имиња сепак си го прават своето и овој натпревар ќе биде центарот на вниманието на фудбалската јавност, а сигурно и на трибините ќе биде весело.

Натпреварите се закажани за 24 овој месец со почеток од 13 часот. Се игра само еден натпревар, без реванш, а доколку по 90 минути нема победник веднаш ќе се шутираат пенали, без продолженија.