Полицијата и војската во Мјанмар пукаа во мирните демонстранти во северниот град Мандалај, објавија денеска локалните медиуми.
Порталот Frontier Myanmar цитираше еден новинар кој рече дека тие исто така пукале во семејни куќи по случаен избор.
Новинарот рече дека неколку лица биле приведени.
Фотографиите објавени на социјалните мрежи покажуваат дека има повредени, наводно од гумени куршуми. Не е познато дали припадници на безбедносните сили користеле вистински куршуми и дали има мртви.
Видеа објавени на Твитер покажуваат дека полицијата маршира по улиците со палки.
Испукани биле и чадни бомби за да се разбијат демонстрантите, а има и наводи на социјалните мрежи дека бил исклучен интернетот во земјата за да не можат демонстрантите да прикачуваат видеа и фотографии од сузбивањето на демонстрациите.
Демонстрантите во Мјанмар веќе десетина дена бараат враќање на цивилната влада под Аунг Сан Су Ќи и нејзино ослободување, откако армијата изврши државен удар и ја стави во притвор.
