Менџерот на Челзи Маурицио Сари даде изјава за медиумите по поразот од 2:0 против Манчестер Сити дека Тибо Куртоа би можел да ги напушти „сините“ летово, објави „Guardian“.
Сѐ почесто се шпекулира дека Белгиецот сака да си замине од лондонскиот клуб, а гласините ги потврди и неговиот агент пред два дена.
Кристоф Хенротај рече дека Куртоа сака да премине во Реал Мадрид, а еден од мотивите е фактот дека ќерка му живее во Шпанија и сака да биде поблиску до неа. Сепак, Сари не сака да слушне што има да каже агентот, туку сака да разговара со Куртоа лично, како што и самиот кажа по вчерашниот пораз.
„Сакам да слушнам што има да каже Куртоа. Ако ми го каже истото што ми го кажа неговиот агент, тогаш секако дека мора да раговараме. Сакаме играчи кои се мотивирани“, рече Италијанецот.
Со оглед на тоа дека трансфер периодот во Англија е скратен оваа сезона и трае до 10 август, еден од условите за да премине Куртоа во Реал е да се најде замена за голманот на Челзи.
Сари уште немал прилика да работи со Белгиецот сезонава бидејќи Куртоа е на продолжен одмор заедно со уште петмина играчи на Челзи поради Светското првенство. Се поставува прашањето дали Челзи ќе успее да најде доволно добра замена до петок.
„Сините“ не одиграа добро против Сити и сега се отвораат прашањата колку може да бидат конкурентни сезонава, а заминувањето на еден од најдобрите голмани сигурно не би одело во прилог на амбициите на лондонскиот клуб.