Претседателот на Лацио, Клаудио Лотито, откри дека одбил понуда од 140 милиони евра за српскиот репрезентативец Сергеј Милинковиќ-Савиќ.
Лотито тврди дека на челниците на Јувентус и Манчестер Јунајтед им рекол дека Србинот не е на продажба. Тој истакна дека Сергеј може да го напушти римскиот клуб само доколку самиот побара трансфер.
„Секогаш се работи за пари. Јас зборувам за техничките и личните квалитети на моите играчи. Милинковиќ-Савиќ не се продава. Никогаш не сум сакал да го продадам. Дали видовте знак 'се продава' на него? За да го купите, ви треба некој што ќе ви го продаде“, рече Лотито на состанокот на претседателите на клубовите во Серија А.
Лотито истакна дека е подготвен да разговара со српскиот офанзивец за евентуален трансфер, но само доколку се јави врвен клуб.
„Многу го ценам Сергеј, тој е врвен играч. Доколку некој голем клуб покаже интерес за играчот, би го прашал што сака“, додаде првиот човек на Лацио.
Лотито истакна дека во римскиот клуб приоритет се човечките односи, а не парите.
„Денес постои проблем со почитта кон човекот и играчот. Во мојот клуб им даваме приоритет на човечките пред финансиските аспекти. Одбив понуда од 140 милиони евра за Сергеј. Не го продадов“, изјави претседателот на Лацио.
Ваквите тврдења на Лотито се тотална спротивност од она што му го правеше на нашиот Горан Пандев кој кога сакаше да си замине беше исфрлен од тимот, па на крајот ја доби тужбата за мобинг и си замина во Интер.
Милинковиќ-Савиќ во 2015 година од Генк се пресели во Лацио за околу 10 милиони евра.