Родениот Австриец одлучи дека сепак крвта не е вода и во иднина ќе се бори за место во хрватската репрезентација, иако таму многу потешко ќе дојде до минутажа.
Роберт Љубичиќ пресече - во иднина ќе настапува за Хрватска, земјата на неговите родители. Се работи за 23-годишен играч од средниот ред чија репрезентативна кариера многу потсетува на онаа на Дејан Кулушевски, само со поинаков крај. Роден во Виена, Љубичиќ фудбалски израсна во Австрија. Во 2019 Хрватите го викнаа да игра во нивните младински селекции, одигра неколку натпревари, но потоа се префрли во младинската репрезентација на Австрија. Буквално ист сличај како Кулушевски, кој, исто така фудбалски израсна во друга земја (Шведска), заигра за Македонија, а потоа се врати да игра за шведските младинци.
Сепак, кога дојде време да се одлучи за сениорската репрезентација, Љубичиќ постапи многу поинаку отколку Кулушевски. Хрватскиот Австриец ја одбра Хрватска, додека македонскиот Швеѓанец ѝ заврте грб Македонија и сега ги брани боите на Шведска.
„Не беше лесно да се донесе ваква одлука со оглед на тоа што пораснав во Австрија, каде што и фудбалски се развивав, за што Австрија, моите тренери и клубови ја имаат мојата најголема благодарност и почит. Сепак, Хрватска ми е во крвта, тоа е народот на моите родители и почувствував силна желба да ја претставувам Хрватска како моја татковина. Им благодарам на ХНС и Динамо што ме поддржаа мене и моето семејство во текот на овој процес и ќе продолжам напорно да работам за да заработам повик во една од најдобрите репрезентации во светот, што би било исполнување на фудбалскиот сон“, изјави Роберт Љубичиќ, пренесува ХНС.
Љубичиќ од лани на клупски план настапува за загрепскиот гигант Динамо. Претходно играше за виенски Рапид, како и Занкт Пелтен.
Неговата промена на спортски пасош ја потврди и ФИФА.
