Фудбалерките на клубот од градот под Шара се победнички на Купот на Македонија откако во денешното финале ја средија Саса со убедливи 4:0.
Интернационалките од Бразил во редовите на Љуботен беа незапирливи за фудбалерките од Македонска Каменица. Тие ги постигнаа првите три гола и тоа Мајса Делгаду Бенедиту во 18. минута, Чеури Харуми Гоја во 20-тата и Едите Силва Присила во 51. минута. Точка на победата стави Бојана Петкова на 9 минути пред крајот.
Финалето се одигра на стадионот „Ѓорче Петров“ во Скопје.
Саса беше бранител на тронот откако го освои Купот минатата сезона. За Љуботен ова е прв куп трофеј во својата историја.
Овие два клуба бијат битка и за титулата во лигата. На табелата во првенството Љуботен води со 47 бодови пред Саса која има 46. До крајот има уште три кола, а овие два клуба ќе се сретнат токму во последното коло закажано за 31 мај, и тоа на теренот на Љуботен.
