Веќе 23 години поранешниот милионер Дејвид Глашин живее на пуст остров, каде друштво му прави неговото куче.
Човекот кој некогаш бил милионер, одлучил да се откаже од сите удобности и луксузи и да се пресели на мал остров на североистокот на Австралија. Бизнисменот и експерт за недвижнини најголемиот дел од богатството го изгубил по пад на берзата во 1987 година. По повеќе обиди да го поврати богатството и да продолжи со луксузниот живот, тој кренал раце од цивилизацијата.
Дејвид вели дека животот на островот со кучето Поли е сè што му е потребно.
„Сакам да умрам овде, ова е мојот Рај на земјата. Кога дојдов на островот бев отруен од желбата за пари. Парите ги трујат луѓето. Поради парите ми се распадна бракот“, вели Дејвид во краткиот документарец за неговиот живот.
Вели дека му недостига разговорот со луѓе и би сакал да има посети на островот, ја сака и природата и додава дека во случај да се најде во неволја, нема кој да му помогне.
Како опасност ги наведува дивите животни. Дејвид е роден во Сиднеј, а порано поседувал компанија која ископувала злато во Папуа Нова Гвинеја. Откако сопругата го напуштила, си ги спакувал куферите и го напуштил градскиот живот.
Еднаш годишно го напушта островот за да обезбеди намирници потребни за живот. Според него, змиите, пајаците и крокодилите се многу подобра варијанта од терористичките напади со кои светот е опкружен.
