Претседателот на Венецуела, Николас Мадуро, вели дека земјата е подготвена да ја трампа својата нафта за да добие вакцини откако коронавирусот зема сѐ поголем замав во оваа јужноамериканска земја.
„Венецуела има танкери со нафта и има муштерии кои сакаат да ја купат нашата нафта. Подготвени сме да трампаме нафта за вакцини, но никого нема да молиме“, вели претседателот.
Проблемот на Венецуела е што државните финансиски средства кои се наоѓаат во странските банки се замрзнати поради наметнатите интернационални санкции, па земјата нема пари за да купи големи количини на вакцини.
Венецуела има можност само да плати за оние вакцини преку КОВАКС системот кои се наменети за посиромашните земји, но и со тоа има проблем.
Минатата недела потпретседателот Делси Родригес соопшти дека 7 милијарди од државните резерви се замрзнати во странски банки. Последен обид на Венецуела беше кога се обиде да си ги поврати златните прачки вредни милијарда долари од Bank of England, но не успеа.
Периодов земјата се соочува со пик на заразата, а од почетокот на пандемијата регистрирани се 156.655 случаи од кои 1.565 луѓе починаа.
На почетокот од месецов, властите одбија да ја одобрат употребата на вакцината на AstraZeneca поради неколкуте пријави за несакани ефекти. Токму вакцини од AstraZeneca ѝ беа доделени преку КОВАКС системот, но не ѝ беа ни доставени поради долгот кој Венецуела го има кон СЗО.
Досега Венецуела ги одобрено само вакцините Спутник V и Sinopharm, а во октомври стана првата земја од Западната хемисфера која се вклучи во клиничките испитувања на руската вакцина. Кон крајот на 2020 година Каракас и Москва потпишаа договор за 10 милиони дози од Спутник V со кои Венецуела процесот на вакцинација го отпочна во февруари. Венецуела е дом на 28 и пол милиони жители.
Мадуро веќе и се вакцинираше со Спутник V.
