Кошаркарите на Мајами Хит го победија Бостон Селтикс со 128:102 и поведоа со 3-0 во финалниот плеј-оф на Источната конференција.
Бостон пред почетокот на плеј-офот важеше за најголем фаворит за титулата, но сега е во речиси безизлезна ситуација и мора да направи огромно чудо, односно да победи во следните четири натпревари за да стигне до големото финале и да се бори за шампионска титула.
Мајами славеше на првите два натпревара во Бостон благодарение го одличниот Џими Батлер, а ноќеска во Мајами херој беше Гејб Винсент со 29 поени.
Батлер дуелот го заврши со 16 поени, 8 скока и 6 асистенции, а одлични беа и Данкан Робинсон со 22 и Кејлеб Мартин со 18 поени.
На другата страна најмногу поени - само 14, постигна Џејсон Тејтум, што доволно говори за играта на целиот тим на Бостон.
Следниот меч повторно се игра во Мајами во ноќта од вторник кон среда во 2:30 часот по македонско време, кога Хит ќе имаат можност со победа да влезат во големото финале. За потсетување, Мајами на табелата заврши осми и преку плеј-инот избори пласман во плеј-оф.
И во финалето на Западот резултатот во партии е 3-0, а води Денвер Нагетс против Лос Анџелес Лејкерс.