Македонската фудбалска репрезентација успеа да се пласира во финалниот бараж за пласман на ЕУРО откако вечерва го елиминираше Косово.
Македонскиот селектор Игор Ангеловски натпреварот го почна со Димитриевски на голот, во одбраната триото Муслиу, Велковски и Бејтулаи, по крилните позиции Алиоски и Ристовски, во средината Адеми и Николов, Барди како треквартиста и во нападот капитенот Пандев и Несторовски.
На почетокот се чувствуваше почетна трема кај македонските фудбалери. Косово имаше два корнера во првите десетина минути, но не успеа да го загрози голот на Димитриевски.
И покрај таквиот старт Македонија постигна гол од првиот обид. Несторовски го бараше Пандев на работ од шестнаесетникот, тој ја пропушти за Адеми кој без размислување му додаде на самиот Ристовски, кој пак упати крајно лош удар. За среќа, топката се одби од Кололи и заврши во гостинската мрежа за водство на „Рисовите“.
Во 29. минута катастрофална грешка на голманот Димитриевски и дефазивецот Велковски на работ од шестнаесетникот, кои не се разбраа убаво премногу чекајќи кој да расчисти, а на крај Велковски проба и не успеа. Топката дојде до Хадерѓонај кој со прецизен лоб удар го израмни резултатот.
Сепак, Велковски брзо се изваде за киксот. При еден слободен удар на Барди во 33. минута, Велковски скокна највисоко во косовскиот казнен простор и со глава заби во мрежата на Муриќ. Ова е прв гол за Велковски во дресот со националните бои во 22. настап.
Најсериозната шанса за израмнување гостите ја имаа во судиското надополување кога Димитриевски се изваде за грешката при првиот гол и со одлича двојна одбрана ја зачува мрежата.
Македонија го задржа водството во вториот дел и успеа да се избори за финален бараж на 12 ноември против Грузија на гости која претходно денеска со гол од пенал ја елиминираше Белорусија со 1:0.