Македонската фудбалска репрезентација во февруарската жрепка ќе влезе од барабанот 3 каде се наоѓа заедно со Словачка, Северна Ирска и Кипар, репрезентации со кои нема да може да се падне.
Лошиот пласман во минатото издание ја смести Македонија во третиот барабан. Барем да бевме најдобри од сите што завршите на трето место во групите, ќе ја искористевме суспензијата на Русија за да бидеме барабан погоре во жрепката. Тоа сега го искористија Фарските Острови кои како најдобра од сите третопласирани отидоа барабан погоре, односно во вториот.
Од барабан 1 можни противници на Македонија ѝ се Романија, Шведска, Ерменија и Луксембург.
Од барабан 2 можни противници ни се Азербејџан, Косово, Бугарија и Фарски Острови.
Од барабан 4 можни противници ни се Белорусија, Естонија, Латвија и победникот од баражот помеѓу Литванија и Гибралтар, двомеч што ќе се игра во март.
Со сите можни противници имаме играно.
Жрепката ќе се одржи на 8 февруари во Париз, Франција во 18 часот. Првично жребот беше закажан за Мадрид, во престолнината на актуелниот победник на Лигата на нации, но беше преместен поради скандалот со бакнежот на претседателот на РФЕФ, Луис Рубиалес.
Комплетниот водич за жрепката во издание на УЕФА можете да го преземете во PDF тука.
