Кошарката ширум државава оди во локдаун откако Федерацијата одлучи да ги прекине сите натпревари по препораките на Владата заради превенција од ширењето на Корона вирусот.
„Земајќи ја предвид моменталната состојба со појавата и ширењето на корона вирусот (COVID-19), како и препораките на Владата на РСМ и Светската здравствена организација, со цел да се заштити здравјето и безбедноста на играчите, тренерите, службените лица и навивачите, раководството на Кошаркарската федерација на Северна Македонија објавува дека сите натпревари во организација на Федерацијата од денеска, четврток, 12 март 2020 година, се одложуваат на неодреден временски период“, вели известувањето објавено на веб-страницата на Федерацијата.
„КФСМ ќе продолжи да ја следи состојбата на дневна основа и ќе ги оценува опциите за продолжување или не, на соодветните натпревари кога и ако ситуацијата тоа го дозволи“, завршува соопштението на Кошаркарската федерација.
Во најквалитетната домашна лига натпреварувањето застанува по 17. коло. Ливер е МЗТ со 31 бод пред Работнички и Гостивар кои имаат по 29. Викендов требаше да се игра 18. коло.
